சூ.ஆ.முத்து நாடார் - ஆசிரியர் நாடார் குல மித்திரன் [1919-1931]

சூ.ஆ.முத்து நாடார் எளிய பண்பான நாடார் குடும்பத்தில் பிறந்து வளர்ந்து நாடார் சமூகத்துக்குச் சேவையாற்றி அம்மக்கள் மனதில் நிலைத்து நிற்கும் அளவிற்கு உயர்ந்தவராக பத்திரிக்கையாளர் திரு சூ.ஆ.முத்து நாடார் அவர்கள் திகழ்கின்றார். 1919ஆம் ஆண்டு இவர் தொடக்கிய ஒரு பத்திரிக்கை நாடார்கள் சமூகத்துக்கு மாத்திரமல்லாமல் சுதந்திர எண்ணத்தை விரிவாக்கச் செயலாற்றியதில் முக்கியத்துவம் வாய்ந்ததாகவும் திகழ்ந்தது. நாடார் குல மித்திரன் எனப் பெயரிட்டு இந்தப் பத்திரிக்கையின் முழு பொறுப்பையும் எடுத்துச் செயல்பட்டு வந்தார் இவர்.அருப்புக்கோட்டையிலிருந்து தாமே ஆசிரியராகவும் திரு.சொக்கலிங்கபாண்டியன் என்பவரை உதவி ஆசிரியராகவும் கொண்டு பணியாற்றினார். மாத வெளியீடாக வந்த நாடார் குல மித்திரன் 1919ஆம் ஆண்டு முதல் 1931ஆம் ஆண்டு வரை 12 ஆண்டுகள் தொடர்ந்து வெளி வந்தது. அரசியல் கொள்கைகளோடு நாடார் சமூகத்து மக்களின் மேம்பாட்டிற்காகப் பல சிந்தனைகளை வித்திட்ட ஒரு சஞ்சிகையாகவும் இது திகழ்ந்தது.இம் முன்னோடி இதழை நினைவு கூறுவோம்.